दक्षिणी सीमामा लागुऔषध कारोबार, प्रहरीको टाउको दुखाइ

अजय शाह

Nepal Live

जनकपुर– महोत्तरीको दक्षिणवर्ती नाका प्रहरीका लागि टाउको दुखाइको विषय बनेको छ।

भारतसँगको खुला सीमानाका कारण पछिल्लो समय लागुऔषध तथा गाँजाको कारोबार बढ्दै गएका छन्। यस्ता कारोबार रोक्नका लागि महोत्तरी प्रहरीलाई चुनौती थपिएको छ।

भारतको विहार सरकारले त्यस राज्यमा मदिरा विक्री वितरण र सेवनामा रोक लगाएपछि त्यहाँका नागरिक मदिरा सेवन गर्न नेपाल आउने गरेका छन्।

महोतरीको सीमावर्ती क्षेत्रहरूमा केही महिनायता प्रहरीले सुरक्षा व्यवस्थामा कडाइ गरेपछि ठूलो परिणाममा लागू औषध र गाँजाको कारोबारी पक्राउ पर्न थालेका छन्।

सीमावर्ती क्षेत्र सम्सीको नाका हुँदै दिनहुँ दर्जनाैं नेपाली युवा भारतीय बजारमा गएर लागुऔषधको सेवन र कारोबार गर्ने गरेको स्थानीय बताउँछन्।

सम्सीका एक शिक्षक बिनोद साहले भने, ‘टिन एजर्स केटाहरू  दिउँसो ११ देखि १२ बजे आउने र पारि पट्टीको कनमा बजारमा गएर नेपालमा प्रतिबन्धित औषधि प्रयोग गरेर साँझ फर्किने गर्दछन्। कतिपयले यस्ता औषधि खरिद गरेर विक्री वितरणको लागि समेत लाने गर्दछन्।’

त्यसैगरी सम्सीका स्थानीय नेता विपिन विहारी युदबिरका अनुसार लागुऔषधको सेवन गर्न भारतीयय बजारमा जाने मा १५ देखि ३५ वर्ष सम्मको युवाहरूको संख्या अत्यधिक रहेको छ।

पछिल्लो समय सम्सीको नाका हुँदै लागुऔषधकर्ताको संख्या बढेकाले सशस्त्र प्रहरी सीमा सुरक्षा बलले चेकजाँचमा थप कडाइ गरेको महोत्तरीका प्रहरी प्रमुख एसपी ईश्वर कार्कीले बताए।

महोत्तरी प्रहरीले रातको समयमा रक्सीको कारोबार रोक्न सीमा क्षेत्रका पसल सञ्चालकहरूलाई पटक पटक आग्रह गरे पनि उनीहरूले रक्सीको कारोबार गर्दै आएका छन्। 

सीमा क्षेत्रका स्थानीयबासीले अवैध रुपमा हुँदै आएको रक्सीको कारोबार रोक्न र सीमा क्षेत्रमा शान्ति सुुरक्षा मजबुुत गर्न महोत्तरी प्रहरीसँग माँग गरेका छन्।

जिल्लामा लागुऔषध दुव्र्यसनीको संख्या वर्षेनी बढ्दै गएको तथ्यांकले देखाएको छ। 

जिल्ला प्रहरी कार्यालयको तथ्यांकअनुसार आव २०७४/०७५ मा लागुऔषध दुर्व्यसन सम्बन्धी ४५ मुद्दा दर्ता गरिएको छ। 

यसअघि आव २०७२/२०७३ र २०७३/०७४ मा क्रमशः १७ र २५ वटा घटना दर्ता भएका थिए।

पछिल्लो गत आव २०७४/०७५ मा दर्ता गरिएका मुद्दामध्ये छुट्टाछुट्टै केलाउँदा बर्दिवास नगरपालिकामा सबैभन्दा बढी १४ घटना दर्ता भएका छन्।

जिल्लाको घटना अभिलेखअनुसार बर्दिवास नगर क्षेत्र अत्यन्त संवेदनशील मानिएको छ। लागुऔषध दुव्र्यसनी र कारोबारीले बर्दिवासलाई नै केन्द्र बनाएका पाइएको प्रहरी अधिकारीको भनाइ छ।

दुर्व्यसनीले गाँजा र चरेश मकवानपुरबाट र लागूऔषधका चक्की (गोटी), क्याप्सुल र सुई महोत्तरीको भारतीय सीमावर्ती सम्सी–कन्हमा र भिठ्ठामोडबाट लिने गरेका पाइएको प्रहरी अनुसन्धानले देखाएको छ।

भारतको बजार भिठ्ठामोड र कन्हमाबाट बर्दिवास र जनकपुरक्षेत्रका दुर्व्यसनीले लागुऔषध लिएर नेपाल फर्कने गरेका पाइएको एसपी कार्कीले बताए।

लागुऔषधको प्रयोग र कारोबारमा बर्दिवासपछि यी नाकाको प्रयोग गर्नेमा जनकपुर भेगका युवा र किशोर पाइएको प्रहरीले जनाएको छ।

गत आव २०७४/०७५ मा पक्राउ परेका ४५ जनामध्ये ३५ जना १५ देखि ३० वर्ष उमेर समूहकाले गाँजा, नाइट्राभेट चक्की, डाईजेपाम, स्पास्मो र ब्रफिनोर्फिन लगायत प्रयोग गर्ने गरेको तथ्यांकमा उल्लेख छ।  

पछिल्लो पटक पुस २ गते महोत्तरीको बर्दिवासमा प्रहरीले दुई सवारी साधनबाट ठूलो परिणामा लागू औषध बरामद गरेको थियो।

सवारी चेकजाँचका क्रममा बा ५ ख ६८१९ नम्बरको राजविराजबाट काठमाडौं जाँदै गरेको हायस गाडीबाट  प्रहरीले डि लेक्स डिसी(सिरब) ६ सय एमएलको सय बोत्तल र नाइट्रोभेट टयाब्लेट ६ सय पिस बरामद गर्यो।

त्यसैगरी बा ३ ख ७४६८ नम्बरको कटारीबाट काठमाडौं जाँदै गरेको यात्रुबाहक बसबाट डि लेक्स डिसी १ सय एमएलको २९ बोत्तल र आधा लिटर को ३ वटा ६ सय एमएलको डिलेक्स डिसि (सिरब) बरामद गरिएको इलाका प्रहरी कार्यालय बर्दिवासले जनायो। 

हायस गाडीमा लागुऔषध लैजाँदै गरेका सिराहाको विष्णुपुर गाँउपालिका–१का २५ वर्षीय अमर कुमार शर्मा (ठाकुर) पक्राउ परेका र बसमा लागुऔषध लुकाएर ल्याउने अभियुक्त फरार रहेको बर्दिवास प्रहरीका प्रहरी नायब उपरीक्षक खगेन्द्र खड्काले जानकारी दिए। 
 

प्राप्त प्रतिकृयाहरू

पढ्नै पर्ने